Platan Everyone Left með Oyama er fyrsta platan sem Reykjavík Record Shop gefur út á vínyl undir nýjum eiganda en platan er jafnframt sú sjötugasta í röðinni hjá útgáfunni.
Nýja platan frá Oyama heitir Everyone left og er fyrsta plata hljómsveitarinnar í fullri lengd síðan þau gáfu út Coolboy fyrir 10 árum og sjá því talnaglöggir að það er jafnlangt síðan að fyrsta plata Oyama kom út og verslunin var stofnuð. Eftir að hafa fylgt Coolboy eftir með tónleikahaldi lagðist sveitin í stuttan dvala, en kom svo saman aftur haustið 2021 og hófst handa við að semja nýtt efni. Það hafa orðið dálitlar mannabreytingar í bandinu og en eins og þau segja sjálf frá voru þau afar heppin að fá gítargoðsögnina Alison MacNeil til að spila með þeim á nýju plötunni. Grunnar að lögunum voru hljóðritaðir í Sundlauginni með Árna Hjörvari Árnasyni í lok árs 2023 en upptökur svo kláraðar í stúdíói Árna Hjörvars og aðstöðu Oyama vorið 2024.
Fyrstu lögin af Everyone left eru farin að hljóma á öldum ljósvakans og það er óhætt að segja að aðdáendur Oyama, draumapopps og skógláps verða ekki fyrir vonbrigðum með plötuna.
Oyama eru þau: Úlfur Alexander Einarsson , Júlía Hermannsdóttir, Jón Þorsteinsson, Ragnar Jón Hrólfsson, Alison MacNeil og Kári Einarsson.
Öll lög á plötunni eru eftir Oyama, Árni Hjörvar Árnason & Oyama sáu um upptökur, Árni Hjörvar hljóðblandaði, Kevin Tuffy sá um master og hönnun umslags gerði Hrefna Sigurðardóttir.
